СООПШТЕНИЕ ДО МЕДИУМИ
по повод кршењето на работничките права во битолска „Шеќерана“

Постојан мобинг и психичко малтретирање, принуден одмор и купишта противзаконити решенија се работните услови во кои работат работниците во Битолската „Шеќерана“ во последните шест месеци - пред нивниот последен отказ, како резултат на осветата на работодавачот затоа што организирале штрајк.

Вработените во „Шеќераната“  денес се наоѓаат во лавиринтите помеѓу судовите и нивните работни места. Иако со одлука на Врховниот суд на РМ нивниот работодавач -  Фабриката за шеќер „4-ти Ноември“ - беше принуден да ги врати на своите работни места по отказите дадени заради организирање на штрајк, работниците пред некој месец одново беа избркани без соодветни причини.

Работниците, уште при нивното враќање, не беа распоредени на истите работни места и континуирано се праќани на принуден одмор. Иако Државниот инспекторат за труд утврдил неправилности во сите овие случаи, работниците денеска се на улица, без никакво образложение или надокнада.

***

Сакаме да ја потсетиме јавноста дека случајот со штрајкот во Фабриката за шеќер е своевиден преседан, бидејќи е единствен штрајк кој е забранет од суд во Р. Македонија како нелегален, и чија разрешница во моментот се процесуира пред Европскиот Суд за човекови права во Стразбург.

Движењето за социјална правда „Ленка“ континуирано ги следи сите случувања од овој случај и ги посетува сите рочишта и настани, со цел да застане на страната на работниците чии права постојано се намалуваат и прекршуваат.

ДСП „Ленка“

СООПШТЕНИЕ ДО МЕДИУМИТЕ

ПО ПОВОД ПРОМОЦИЈА НА ИСТРАЖУВАЧКИ СТИДИИ ЗА РАБОТНИЧКИТЕ ПРАВА

Во среда (14ти декември 2011 година), со почеток во 18:00 часот, во просториите на Фондацијата „Фокус“ (Центар за поддршка на НВО-и) во населбата Дворови во Велес – Движењето за социјална правда „Ленка“ ќе одржи промоција на двете најнови истражувачки студии:
1. Штрајк - искуства и состојби (уредник: д-р Здравко Савески);
2. Работни спорови - позитивни примери од судската пракса (автори: Димитар Апасиев, Ива Михајловска, Александар Ковачевски, Стефан Бошковски, Горан Секулоски, Сашо Карапанчев и Игор Мишевски).

Книгите се издадени во текот на изминатава година со поддршка на германската фондација „Роза Луксембург“ во рамки на проектот: Промоција и заштита на работничките права. Тие сoдржат вистински приказни на рабoтници и синдикалци кoи решиле свoите права од работен однос да ги бараат или по пат на штрајк или преку покренување судска постапка против својот работодавач. На промоцијата ќе бидат презентирани сознанијата и заклучоците до кои се дојде преку овие правни студии.

Примероците од студијата се некомерцијални и не можат да се најдат во продажба, а ќе бидат бесплатни за присутните.