Новата комунистичка партија на Југославија (НКПЈ) ја повика Владата на Србија да донесе одлука за поднесување кандидатура за членство во БРИКС, меѓународна организација основана од Бразил, Русија, Индија, Кина и Јужна Африка.
„Главната причина за поднесување кандидатура за влез во БРИКС е фактот што земјите кои првично ја основаа таа организација се пријателски расположени кон Србија и што е најважно, ниту една од нив не ја призна независноста на лажната држава Косово“, се наведува во соопштението.
НКПЈ смета дека земјите основачи на БРИКС претставуваат значајна алтернатива на „експанзионистичката политика на западниот империјализам, која се спроведува заради алчните интереси на мултинационалниот голем капитал“, и дека во интерес на Србија е да го запре процесот на приклучување кон „занданата на народите – Европската унија“.
Таа партија во соопштението наведе дека ЕУ и нејзините „империјалистички сојузници“ САД и НАТО ја признаваат независноста на Косово, дека извршиле агресија врз СР Југославија и претходно учествувале во распадот на СФР Југославија со предизвикување „братоубиствена војна“, додека мултинационалните компании извлекуваат огромни профити од тие земји од Србија користејќи евтина работна сила, а со тоа придонесува за високата стапка на сиромаштија и невработеност во Србија.
„Прикажаните податоци јасно покажуваат дека има низа причини Србија да се приклучи кон организацијата БРИКС бидејќи тоа е во апсолутен интерес и на граѓаните и на нашата земја, додека од друга страна не постои валидна причина веднаш да не се запре процес на приклучување кон империјалистичката Европска унија чија единствена цел е да ги направи богатите уште побогати, а сиромашните уште посиромашни“, се додава во соопштението.